Aita Zanetti

Fabrichar punts. Da cumünanza.

Als 14 da gün 2026 candidesch eu insembel cun Carmelia Maissen e Marcus Caduff per ün sez illa regenza dal chantun Grischun. Meis böt es da colliar – da fabrichar punts – tanter las differentas regiuns da nos chantun multifari. Mias experienzas sco abitanta dad üna vallada dal süd, capo cumünal da Scuol, grond cusgliera ed anteriura presidenta dal Grond cussagl am han fuormada e dat in man üna vasta schelta d’üsaglias chi servan ad accumplir las lezchas illa regenza grischuna. Cun meis esser simpel e e dastrusch a la populaziun, cul plaschair da lavurar e da decider, cun meis möd da colliar e da fabrichar punts e cun mia vasta experienza am ingascha per ün chantun Grischun uni e chi as sviluppa inavant.

> per üna cultura vivüda

> per ün lö da fuormaziun ferm

> per agricultura e spazi da viver

Cultura

Da cumünanza per üna cultura vivüda.

Svilup da las sportas culturalas e chüra da tradiziuns existentas.
Mantegner, chürar e sviluppar las trais linguas dal chantun.

La cultura inrichischa il chantun Grischun e collia umans sur generaziuns e cunfins oura. Per cha tradiziuns possan restar vivas e nouv po nascher, douvra chüra, svilup e sportas culturalas chi s’affan culs bsögns da la populaziun. Sportas culturalas dessan gnir rinforzadas là, ingio chi vegnan vivüdas e fan effet. In societats, instituziuns e progets, chi pussibilteschan inscunters. Precis uschè importanta es la chüra da las trais linguas chantunalas. Lingua significha identità, ed il barat tanter las differentas regiuns linguisticas rinforza l’incletta e l’identità e rinforza finalmaing il chantun.

al video

Fuormaziun

Da cumünanza per üna fuormaziun chi driva portas.

Fuormaziun professiunala ferma. Rinforz dal sistem d’educaziun dual.

La fuormaziun in Grischun dess drivir portas e s-chaffir perspectivas, da la fuormaziun professiunala sur las scoulas medias fin pro las scoulas otas professiunalas. Il sistem d’educaziun dual es da grond’importanza : el collia la pratica culla teoria e fuorma persunas qualifichadas chi sun tscherchadas e da gronda valur. Ün’otra pütta ferma sun las scoulas medias e las scoulas otas da professiun. Ellas permettan a la prosma generaziun d’approfundir lur savüda e sun la fundamainta per ün svilup vers il futur, per nouvas vias ed ideas originalas. Uschè resta il sistem da fuormaziun multifari e pussibiltescha vias professiunalas individualas.

al video

Natüra ed ambiaint

Da cumünanza per agricultura e spazi da viver.

Promoziun da l’agricultura. Viver in e cun la natüra.

L’agricultura e la natüra toccan insembel in Grischun. Chi chi porta respunsabiltà ill’agricultura, sa : I voul terrain san, aua netta e process stabils, per cha paurarias sajan persistentas. Al medem temp chüra l’agricultura la cuntrada e pissera per creaziun da valur in bleras valladas. Instrumaints da promoziun dessan perquai funcziunar in ün möd pratic, la lavur dess gnir predschada e la sgürezza pel futur dess esser datta. Uschè resta üna vita insembel culla natüra pussibla.

al video